Zelenskinin anti-qəhrəman adlandırdığı general G7 ölkələrindən birində siyasi sığınacaq istəyib...
Poliqon xəbər verir ki, Naumov BBC-nin Ukrayna xidmətinə müsahibəsində bu barədə danışıb.
Ukrayna Təhlükəsizlik Xidmətinin (SBU) keçmiş generalı Andrey Naumov G7 ölkələrindən birindən siyasi sığınacaq istəyib. Qeyd edək ki, 2023-cü ilin dekabrında Naumov çirkli pulların yuyulmasına görə cəza çəkdiyi Serbiya həbsxanasından azad edilib. General Ukraynada dələduzluq və sui-istifadə ittihamı ilə axtarışa verilib.
Naumov bildirib ki, gələcəkdə Ukraynaya qayıtmaq istəyir, ancaq bunu ölkəsində onu "ədalətli məhkəmə" gözlədiyi zaman edəcək. O, həm Serbiya məhkəməsinin qərarı, həm də Ukrayna hadisələri ilə bağlı Avropa İnsan Haqları Məhkəməsinə müraciət etmək niyyətindədir. Naumov Ukraynada ona qarşı irəli sürülən cinayətlərdə təqsirini boynuna almayıb, onları nüfuzdan salmaq və qisas almaq hesab edir.
Serbiya məhkəməsi keçmiş generalın Ukraynaya ekstradisiyasından imtina edib. O, Serbiyanı tərk edə bilməz, çünki apellyasiya prosesi başa çatana qədər sənədləri müsadirə olunub.
"Ukrayinska Pravda" yazıb ki, Naumov Rusiya qoşunlarının daxil olmasına bir neçə saat qalmış Ukraynanı tərk edib. Serbiyada o, 2022-ci ilin yayında bəyan edilməmiş nağd pulla - təxminən 600 min avro və 120 min dollarla saxlanılıb.
Ukrayna prezidenti Volodimir Zelenski Naumovu "anti-qəhrəman" adlandıraraq general rütbəsindən məhrum edib. Keçmiş general vətənində dələduzluq və sui-istifadədə şübhəli bilinməsi ilə yanaşı, dövlətə xəyanətdə ittiham olunur. Lakin bununla bağlı heç bir şübhə yaranmayıb.
Poliqon.info